МЕДИА-ПОРТАЛ: "НурЧолпондун "Эркиндик" клибин тартууда убакыттын тардыгынан көп нерсе биз ойлогондой болбой калды" дейт режиссёр

Элди патриоттуулукка үндөгөн чыгармалардын бири болгон "Эркиндик" ырын жаш ырчы НурЧолпон аткарат. Ырчынын продюсери, режиссёр Сүйүн Откеев жогоруда аталган ырдын клиби тууралуу интернет колдонуучулар жылуу пикирлерин жазып жатышканын айтат.

"Клип күз мезгилинин алгачкы айларында тартылып, жакында эле көрүүчүлөргө тартууланды. Убакыттын тардыгынан ат чаап бараткан же дагы башка кыргыздын жакшы каада-салтын чагылдырган кадрларды тартууга мүмкүн болбой калды.

Кеч күз болуп, бирде жамгыр, бирде кар жаап жаткандыктан, өлкөбүздүн кооз жерлерин тарта албай калдык. Андыктан кооз кадр, сүрөттөр менен клипти кооздогонго туура келди. Ооба, бул ырга мындан да жакшы клип тартса болмок, бирок убакыттын тардыгынан көп нерсе биз ойлогондой болбой калды.

Ага карабай колдонуучулар чыгарма тууралуу жакшы пикирлерин айтып жатышат. Буюрса, мындан ары НурЧолпондун башка клиптеринин үстүнөн иштеп баштайбыз", - дейт С.Откеев.

НурЧолпондун "Эркиндик" ырынын клибин бул жерден көрүңүз.