Ырчы Чолпонай Эрнест Уметалиевге турмушка чыкканын жар салды

Эстрада ырчысы Чолпонай өзүнүн Инстаграм баракчасына продюсери Эрнест Уметалиевге баш кошконун жарыялады. "Биз Эка (Эрнест Уметалиев. ред.) экөөбүз акыры баш коштук. Үйлөнүү тойдун алдындагы даярдыктар боюнча чуркап жүрүп, баш кошкондон бир нече ай өткөн соң расмий каттоодон өтүп, нике күбөлүгүн алдык", - деп жазат ырчы. Акыркы учурларда сахнадан алыстап, концерттерге катыша албай калганынын себебин ал турмушка чыкканы менен байланыштырды.

"Мени кыргыздын салты менен келип алып кетишти. Үй-бүлө курууда жасалып келген кыргыздын бардык салт-санаалары колдонулду. Мени өткөн жылы эле (2016-жыл. ред.) алып кетишкен. Туугандарыбыз, досторубуз, кошуналарыбыз куттуктап келип жатышып, эч нерсеге кол тийбей калды. Эми бир аз колубуз бошоп, каттоого туруп, бул кубанычыбызды сиздер менен бөлүшүп жатабыз. Алдыда үлпөт той турат", - дейт ырчы.

Эске сала кетсек, 2013-жылдын декабрь айында Чолпонайдын жеке концертинен кийинки кечеде Эрнест Уметалиев ага шакек салып, колун сураган. Өнөр адамдары буга чейинки мамилесинин узактыгы 10 жылдан ашарын айтып келишкен. Алар "Ак шоола" балдар ансамблинде чогуу тарбияланышып, кийин "Кылым" эстрадалык тобун түзүшүп, бул топто да бирге ырдап келишкени маалым.