ЖЫЛНААМА, 12-ЯНВАРЬ: 49 жашка толгон Айчүрөк Иманалиева "жолдошум туулган күнүмдө уюлдук телефон тартуулады" дейт

Бүгүн, 12-январда белгилүү эстрада ырчысы Айчүрөк Иманалиева 49 жашка толду. Аны куттуктап байланышка чыксак, SUPER.KG порталына ыраазычылыгын билдирип, уулу жана кызынын дагы туулган күнү экенин айтты.

"Бүгүн уулум Арлен 18 жашка, кызым Аэлита 11 жашка толду. Саат 00:00дө жолдошум биринчи болуп куттуктап, үчөөбүзгө уюлдук телефон белек кылды. Кызым менен уулум туулган күндөрүн достору менен белгилешет, ал эми мен өздүк майрамымды үйдө өткөрүүнү чечтим", - деди ал.

А.Иманалиева 1968-жылы 12-январда Талас облусуна караштуу Талас районунун Калба айылында туулган. Токтогул Сатылганов атындагы Кыргыз улуттук филармониясынын эки жылдык эстрада студиясын жана Мураталы Күрөңкеев атындагы музыкалык окуу жайды бүтүргөн. Жаш көрүүчүлөр театрындагы эстрадалык топко кирип, айтылуу "Роза гүлү" аттуу ырынан тартып анын эстрада ырчысы катары сапары башталган. "Кызыл гүл" ыры менен жалпы кыргыз журтчулугуна таанылган. 1995-1996-жылдардагы "Азия даусы" Эл аралык фестивалынын ардактуу мейманы болуп, 1996-жылы Нью-Йорк шаарында өткөн Бүткүл дүйнөлүк эстрадалык фестивалга катышып келген. 1999-жылы Беларуста өткөн "Славян базары" Эл аралык сынагынын дипломанты, Украинадагы "Алтын скиф" Эл аралык сынагынын лауреаты, Казакстандын Кыргыз Республикасындагы элчилигинин Ардактуу дипломунун ээси. Айчүрөк Иманалиева 2013-жылы "Супер-Инфо" гезитинин версиясы боюнча "Заманыбыздын супер ырчысы" деп табылган.