ЖЫЛНААМА, 19-ЯНВАРЬ: Ырчы Жийдеш Идирисова 32 жашка толду

Бүгүн, 19-январда ырчы Жийдеш Идирисова 32 жашка толду. Ырчыга байланышканыбызда жумуштар менен алек болуп жатканын айтты.

"Музыкалык билим берген мектеп ачалы деп жатам. Учурда ошол иштерим менен алекмин. Өздүк майрамыма карата куттуктоолор көп болууда. Биринчилерден болуп жолдошум, апам куттуктады. Туулган күнүмдү досторум, үй-бүлөм менен кечинде өткөрөйүн деп жатам", - деди ал.

Ырчы 1985-жылы 19-январда Нарын шаарында туулган. "Эдем алмасы" аттуу тасманын саундтрегин аткарып, эл оозуна алынган. "Артек" музыкалык тобунда 6 жылдан ашык иштеп, андан соң "Сен" деген ыры менен жеке карьерасын баштаган. 2015-жылдын 19-декабрында Түркиянын Стамбул шаарында өткөн "Turkvizyon-2015" Эл аралык сынагынын гранд-финалында мамлекетибиздин атынан чыккан ырчы "Ким билет?" аттуу ырды аткарып, 1-орунду ээлеген.

Эскерте кетсек, Ж.Идирисова 2016-жылдын декабрь айында өткөн SUPER.KG порталынын 10 жылдык мааракесине байланыштуу "Супер концертте" ырчылар менен бирге "Super.kg'ге арноо ырын" аткарган.

19-январга карата жылнаама.