Авиакырсыктан жабыркагандарга жардам иретинде чогултулган каражат 8 миллион 769 968 сомго жетти

Авиакырсыктан жабыркагандарга жардам иретинде чогултулган каражаттын суммасы 8 миллион 769 968 сомго жетти. Бул тууралуу бүгүн, 19-январда Өзгөчө кырдаалдар министрлигинин басма сөз кызматынан билдиришти.

Эскерте кетсек, эртең мененки саат 10:00гө карата атайын ачылган бирдиктүү эсепке 5 миллион 723 783 сом 35 тыйын которулса, саат 14:00гө карата 8 миллион 769 968 сом 35 тыйын келип түшкөн. 4 сааттын ичинде аталган сумма 3 миллион 071 185 сомго өстү. Учурда авиакырсыктан каза болгондорго жана каза болгондордун жакындарына жардам катары элден акча которуулар уланууда.

Мындан тышкары учак кырсыгынан жабыркагандарга мамлекеттик мекеме-ишканалар, жеке тараптар жана Орусия, Казакстан өлкөлөрүндөгү кайдыгер карабаган инсандар жардам колун сунуп, тийиштүү жардамдарын беришкен.

16-январда Чүй облусундагы Сокулук районуна караштуу Курулуш башкармалыгынын дачалары аймагына Түркиянын жүк ташуучу учагы кулап түшүп, кырсыктын кесепетинен 34 Кыргыз жараны жана 4 экипаж мүчөсү каза тапкан. Бул кырсыктан жабыркагандардын үй-бүлөлөрүнө өкмөттүн буйругу менен ӨКМ тарабынан бирдиктүү эсеп ачылган.