ЖЫЛНААМА, 24-ЯНВАРЬ: 10 жыл мурун кыргыздын туңгуч гитарачысы, көрүнүктүү маданий ишмер Даниал Назарматов көз жумган

Дүйнө элдеринин шайырларына орток байыркы чертме музыкалык аспап - гитарада манжаларын жорго салдыра ойногон кыргыздын туңгуч гитарачысы, гитара өнөрүнүн мектебин негиздеген, музыка изилдөөчү, педагог, профессор Даниал Назарматов 1940-жылы Нарын шаарында туулган. 1968-жылы Пётр Чайковский атындагы Москва мамлекеттик консерваториясынын алдындагы музыкалык окуу жайда атактуу дүйнөлүк ысымдагы гитарачы Иванов - Крамскойдун классын, ал эми 1976-жылы Бүбүсара Бейшеналиева атындагы искусство институтун бүтүрөт. Ал алгачкы эмгек жолун Мураталы Күрөңкеев атындагы музыкалык окуу жайынан баштаган. Ал жакта 1968-1979-жылдары мугалим, 1969-1971-жылдары Бишкектеги балдардын Шубин атындагы музыкалык мектебинин директорунун орун басары, 1976-1982-жылдары Токтогул Сатылганов атындагы Кыргыз мамлекеттик филармониясынын көркөм жетекчиси, 1982-1990-жылдары директору, ошол эле учурда 1987-жылдан тарта Бүткүл союздук музыкалык коомдун кыргыз бөлүмүнүн төрагасынын орун басары, 1991-1993-жылдары Кыргыз Республикасынын Маданият министри, ал эми 1993-жылдары Абдылас Малдыбаев атындагы Кыргыз мамлекеттик академиялык опера жана балет театрынын башкы директору болгон.

Даниал Назарматов 1990-1995-жылдары легендарлуу Жогорку Кеңештин депутаты болуу менен бирге басса-турса, кайда барса да колунан гитарасын түшүрбөй улуу шайырлардын күүлөрүн, обондорун гитара үчүн иштеп чыгат. Алсак, Карамолдо Орозовдун "Көкөй кестисин", "Ибаратын", "Жаш кербезин", Мураталы Күрөңкеевдин "Кер-Өзөнүн", Асанбек Кыдырназаровдун "Кыргыз көчүн" жана башка күүлөрдү гитарага салган.