ЖЫЛНААМА, 25-ЯНВАРЬ: Куудул, актёр Бакыт Мукул туулган күнүн апасынын жанында тосту

Бүгүн, 25-январда белгилүү актёр, куудул жана режиссёр Бакыт Мукул 52 жашка толду. Аны туулган күнү менен куттуктап байланышка чыксак, SUPER.KG порталына ыраазычылыгын билдирип, туулган күнүн апасынын жанында тосконун айтты.

"Учурда Балыкчыдамын. Туулган күнүмдү апамдын жанында тостум. Кээ бир адамдар туулган күнү келсе, картайып жатам деп кайгырат экен. Өздүк майрамыңда улуулардын батасын алып, жакындарыңдан жакшы сөздөрдү, каалоо-тилектерди угуу кандай жагымдуу!" - деди актёр.

Б.Мукул 1965-жылы 25-январда Нарын облусуна караштуу Нарын районундагы Учкун айылында жарык дүйнөгө келген. Эмгек жолун Нарын театрынан баштап, Кыргыз драма театрынын алдындагы 2 жылдык окууга тапшырып, билим алган. Андан соң Жаштар театрында, Чүй облустук театрында иштеп, 40ка чукул тасмада роль жараткан. Ал 50гө жакын ырдын жана 30дан ашык сатиранын автору.

Белгилей кетсек, 2016-жылдын сентябрь айында Бакыт Мукул жана Дастан Жапар уулу режиссёрлук кылган "Атанын керээзи" тасмасы Монреаль шаарында өткөн эл аралык кинофестивалда "Алтын Зенит" байгесин, ноябрь айында Минск шаарында өткөн "Листопад" Эл аралык кинофестивалында "Салттарга заманбап көз караш", эл аралык кызматташтыкты жана достукту бекемдөөгө кошкон салымы үчүн "Чеги жок тасма" сыйлыгын жана Минск шаарынын Аткаруу комитетинин атайын байгесин алган. Мындан тышкары Б.Мукул 2016-жылы декабрь айында "КРнын Эмгек сиңирген артисти" наамына ээ болгон. 3 уулдун атасы.

25-январга карата жылнаама.