Кош бойлуу Бейонсенин сүрөтү интернетте жаңы рекорд жаратты

Америкалык ырчы Бейонсенин кош бойлуу экени чет элдик басылмалардын башкы жаңылыгына айланган. Бул кабар тууралуу ырчы Instagram`дагы жеке баракчасы аркылуу маалымдаган. Анын бул билдирүүсү социалдык тармактарда буга чейин "интернет ханышасы" аталган Ким Кардашьянды жана баракчасына 108 миллион колдонуучу жазылган Селена Гомести артка таштап, жаңы рекорд коюусуна себепчи болгон. Бул көрсөткүч расмий "Гиннесстин рекорддор китебине" катталбаганы менен, учурда басылмаларда кызуу талкууга алынууда.

Алгачкы 10 саатта эле кош бойлуу Бейонсенин сүрөтүнө 7 миллионго жакын "жакты" белгиси коюлуп, 300 миңден ашуун билдирүү калтырылган. Бул сан учурда дагы да өсүүдө.

Буга чейин "жүрөкчөлөрдү" топтоо боюнча Селена Гомес "рекордчу" аталып келген. Анын өткөн жылдын июль айында газдалган ичимдикти кармап турган сүрөтү 6 миллиондон ашуун "лайк" топтогон. Бирок Бейонсенин сүрөтүндөгүдөй кыска убакытта эмес, 7 айдын аралыгында.