Голливудда тартылып, көрүүчүнү бирде күлдүрүп, бирде ыйлаткан "Апамды издеп" тасмасы тар чөйрөдө көрсөтүлдү (фото)

6-февралда Бишкектеги "Космопарк" эс алуу борборунда көпчүлүк күткөн "Апамды издеп" комедиялык тасмасы тар чөйрөдө көрсөтүлдү. Анда башкы каармандардын образын Азамат Уланов менен казак актёру Тауекел Мусилим жаратышкан. Ошондой эле анда Марат Козукеев, Жеңишбек Майрамбек уулун жана башка америкалык актёрлорду көрүүгө болот. Тасма Кыргыз өлкөсүндө, Казакстанда жана АКШнын Лос-Анжелес шаарында тартылган.

Кызыгы, фильм башталардан мурда залдагы ар бир отургучтун жанына бирден кагаз салфетка коюлган эле. Анын сыры тасма соңунда баарына түшүнүктүү болуп, коюлган салфетканын кереги тийди окшойт. Себеби фильм таасирдүү тартылгандыктан алгач жүздөрүнөн күлкү кетпей, каткырып отурган көрүүчүлөр соңунда аял-эркек дебей көздөрүнө жаш алышты.

Тасманын режиссёру Руслан Акундун айтымында, тартуучу топтун эмгеги, идеялары тасманын ийгиликтүү тартылышына түрткү болгон. "Балалуу болгондон кийин жаш балдарга болгон көз карашым өзгөрдү. Чоң адам менен жаш баланын ортосунда достук болушу мүмкүнбү деп ойлонуп, Бакыт менен Жеңишке сценарий жазып берүү сунушу менен кайрылдым. Сценарий жалпы 6 айда, тасма 2 жылда толук тартылып бүттү. Тасманы тарткан жалпы команда, продюсерлердин мыктылыгынан баары ойдогудай соңуна чыкты деп ойлойм. Эч бир режиссёр менин эмгегим мыкты деп ойлобосо керек. Андыктан көрүүчү көрүп, өз баасын берет деп ишенем", - дейт режиссёр Руслан Акун.

Азамат Уланов аталган фильмге тартылып, чоң тажрыйба алып, тартуу аянтчасында эстен кеткис күндөрдү өткөргөнүн айтса, Тауекел Мусилим өз ишинин профессионалдары болгон Нурбек Айбашов, Руслан Акун, Бакыт Осмонканов, Жеңишбек Майрамбек уулу сыяктуу жигиттер менен иштешип, көп нерсени билип, үйрөнгөнүн, профессионалдык жактан өсүү болгонун айтат.

"Бул менин алгачкы толук метраждуу тасмам, андыктан эл кандай кабыл алат, бир көрүп унутуп калбайбы деп ойлонуп, тынчсызданат экенсиң. Көрүүчүлөр менен кошо мен да азыр толук көрдүм, өзүмө аябай жакты. Чыгармачылыкта, жашоодо мыкты тажрыйба топтоого, эл-жер көрүүгө мүмкүнчүлүк берген тасманын жаратуучуларына чоң ыраазычылыгымды билдирем".

Ал эми Америкадан бери келген актёр Майкл Мапонго Кыргыз жерин, кыргыз кесиптештерин сүйүп калганын айтат. "Буга чейин бир нече тасмаларда роль жараткам. Чет элдик тасмага биринчи жолу түшүп жатам. Баары сонун болду. Айрыкча "Кара жорго" бийине кызыгып жүрүп, азыр бийлеп үйрөнүп калдым", - дейт Майкл Мапонго.

Тасмада Азамат аттуу башкы каармандын жетим балдар үйүндө тарбияланып, өзгөчө эс тутумга ээ, акылдуу болуп, анын апасын издөө кыялы көрсөтүлөт. Бир топ кыйынчылыктарды башынан өткөргөн каарман бир күнү Голливудга апасын издеп сапарга аттанат. Бейтааныш эл, бөтөн жерге эч бир таанышы жок барган кичинекей каарманды тагдырдын түрдүү сыноосу, күтүлбөгөн окуялар жана америкалык жашоочулар менен кызыктар күтүп турган болот. Башкы каармандын атасына эмне болгон, ал өмүр бою издеген апасына жолугуп, Америкадан алып келеби деп ойлондуңуз беле? Жашоодо эмне маанилүү, акчабы же ата-эне, достукпу, мына ушундай жана башка көптөгөн суроолорго тасмадан жооп табууга болот.

Айта кетсек, "Апамды издеп" тасмасы 9-февралдан тарта өлкөбүздөгү бардык кинотеатрларда көрсөтүлө баштайт.