"Эйрдизастер" уюму: Боингдин экипажы учакты кондурууда бийиктикти көзөмөлдөгөн эмес

16-январда "Манас" аэропортуна жакын жерге кулаган Боинг 747 учагынын экипажы учакты кондуруп жатканда бийиктикти көзөмөлдөгөн эмес. Мындай жыйынтыкка СССРдин курамында болгон мамлекеттердеги авиакырсыктарды иликтеген "Эйрдизастер" уюму келди.

"Учакта жалпы салмагы 85 миң 618 килограмм жүктө түрдүү турмуш-тиричилик электроника буюмдары болгон. "Манас" аэропортунда май толтуруу пландалган болчу. Аэропортко конуу түнү оор табигый шарттар да өтүп жаткан", - деп айтылат маалыматта.

"Боингдин экипажы учакты кондуруу аракетинде бийиктикти көзөмөлдөөнү жүргүзгөн эмес. Мындан улам саатына 370 чакырым ылдамдык менен учуп жаткан учак конууну белгиленген траекториядан 200 метрге жогору жерден баштаган. Экипаж мынтип коопсуз конуу мүмкүн эместигин эске албай койгон. Учак учуп-конуу тилкесинин үстүнөн толук өткөндө, экипаж жердеги белгилерди көрбөгөндүктөн 30 метр бийиктикте кайра айланып конууну чечкен. Бирок учак аэропорттун бетон тосмосун сүзүп, конуштун үстүнө кулап, өрттөнүп кеткен", - деген жыйынтыкка келди аталган уюм.

Айта кетсек, Боинг кырсыгын Мамлекеттер аралык авиация комитетинин алдында түзүлгөн комиссия иликтеп жатат. Ал окуядан 30 күн өткөн соң алдын ала жыйынтыгын чыгарыш керек экени айтылган. "Кулаган учакты пайдаланган Түркиянын Кырсыктарды иликтөө комитети алдын ала жыйынтыктын долбоору менен таанышууну сурагандыктан, бул документти жарыялоо Түрк тарабы комментарий бергенден кийин жарыяланат", - деп айтылган МАМдын маалыматында.

Боинг кырсыгынан улам "Аэрофлот" дачалык тилкесиндеги 17 үй толук жараксыз абалга келип, 6 үй жабыркаган. Окуя болгон жерден 34 адам каза болгон (алардын 17си жаш балдар). 14 адам жаракат алган, алардын бири 21-январда көз жумган. Экипаждын 3 мүчөсү кырсык болгон учурда каза тапкан, төртүнчүсү ооруканага жеткирилип бара жаткан жеринен көз жумган.