Бишкекте "Манас" кинотеатрында "Понт" аталышындагы кинокомедиянын ачылуу аземи болуп өттү

Бүгүн, 22-февралда Бишкектеги "Манас" кинотеатрында "Понт" аталышындагы кинокомедиянын ачылуу аземи болуп өттү. Ага көпчүлүк жаштар, эстрада ырчыларынан Акбар Сүйүнбаев, Арсен, Турдакун Ниязалиев, Бек Исраилов, "тамашоучулар" Санжар Мыкыев, Азамат Исмаилов, Актан Ырыскелдиев ошондой эле шоумен Бакыт Байсариев жубайлары менен келишкен.

"Мен бул кинодон көп нерсени үмүт кылам. Буюрса, кыргыз киносу өнүгүп, сандан сапатка өтүүдө. Бул жолу жубайым менен кинонун аталышына кызыгып, эс алуу максатында ошондой эле кино жаатында эмгектенген өнөр адамдарынын эмгегине күбө болуп кетүү үчүн келдик", - деди шоумен Байсариев.

Режиссёр Кубанычбек Курманбековдун айтымында, комедиялуу тасма эки ай аралыгында тартылып бүткөн. Көпчүлүк учурда кадрлар борбор калаада, ал эми айрым эпизоддору Ысык-Көлдүн жээгинде тартылган. Тасманын жалпы чыгымы 20 миң долларга жеткен.

“Бул менин үчүнчү жолу кино тартышым. Буга чейин “Сулайман султан”, "Бир мешок акча” аттуу кинолорду тарткам. Бул жолу кино жаратуучулар комедиялуу тасма тартып, көрүүчүлөрдү күлкүгө бөлөөнү туура көрдүк”, - деп билдирди "Понт" кинокомедиясынын режиссёру Курманбеков.

Тасмага белгилүү актёр Назым Меңдибаев, Эгемберди Бекболиев, жаш актёрлордон Самат Эркинбеков, Азамат Исмаилов, Эмил Эсеналиев тартылышкан.

Ал эми актёр Азамат Исмаилов фильмге тартылууга сунуш түшүп, дароо макулдугун бергенин айтат.

"Мында жалгыз гана мен башкы каарман эмесмин. Менден башка дагы 4 жигит башкы каармандын образын жаратты. Алгач сунуш түшкөндө чакан эле образ жаратам го деп ойлогом. Кийин сценарий менен таанышып кинонун баштан аягына чейин роль жаратарымды билдим. Бул менин 5-6-жолу роль жаратышым. Буга чейин жараткан образдарым мага жаккан эмес. Бул жолу купулума толду", - деп билдирди Азамат Исмаилов.

Фильмдин мазмуну Европадан алынып келинген 14-кылымдарга таандык кымбат баалуу сүрөт аба майданында алмашып кетет. Ошол эле учурда ал калаада аукционго коюлуп, сүрөт чоң акчага сатылат. Бирок сатып алуучуга сүрөт тийбей аны Алтуга жана Шума аттуу жигиттер издеп жөнөшөт. Кинонун уландысын 23-февралдан тартып, кинотеатрлардан көрө аласыздар.