"13 жаштагы аталаш карындашын зордуктады" деп айыпталган Эрлан Дөлөнов 22 жылга соттолду

"13 жаштагы аталаш карындашын зордуктады" деп айыпталган Эрлан Дөлөнов 22 жылга соттолду. Бул тууралуу бүгүн, 25-февралда SUPER.KG порталына жабырлануучу кыздын эжеси Рахима Айкымбаева билдирди.

Анын айтымына караганда, тиешелүү чечимди кечээ, 24-февралда Талас облустук соту чыгарган. Ага ылайык Эрлан Дөлөнов Кылмыш-жаза кодексинин 129 (зордуктоо) жана 132 (он алты жашка толо элек адам менен жыныстык катнашта болуу жана сексуалдык мүнөздөгү башка аракеттерди жасоо) беренелери боюнча күнөөлүү деп табылды.

Ал эми айыпталуучунун жакындары Эрлан Дөлөновдун күнөөсү далилденбегенин айтып келишет.

Бул ишти алгач Бакай-Ата райондук соту карап, 2015-жылдын 2-декабрындагы чечими менен Эрлан Дөлөновду Кылмыш-жаза кодексинин 132-беренеси менен күнөөлүү деп таап, 3 жылга шарттуу соттогон. Бул чечимге макул болбогон жабырлануучу тарап облустук сотко кайрылган. Талас облустук соту 2016-жылдын 21-январындагы чечиминин негизинде райондук соттун чечимин өзгөртүүсүз калтырган. Ал эми 2016-жылдын 12-апрелинде Жогорку Сот ишти кайра кароо үчүн Бакай-Ата райондук сотуна жөнөткөн. Кайра жөнөтүлгөн ишти башка сот карашы керек болгондуктан Манас райондук соту караган. Анда Дөлөнов 132-берене боюнча айыпталып, 1 жыл 6 айга эркинен ажыратылган. Кийин ишти Талас облустук соту карап жаткан.