Чемпиондор Лигасы: “Барселона” өз үйүндө “ПСЖ” командасын кабыл алат, дортмунддук “Боруссия” “Бенфика” менен ойнойт

Бүгүн Чемпиондор Лигасынын жарым чейрек финалынын жооптук беттештери уланат. Анда Барселона шаарында жергиликтүү команда француздук “ПСЖ” командасын кабыл алат. Ал эми Дортмунд шаарында “Боруссия” португалиялык “Бенфика” менен күч сынашат.

"Барселона" (Испания) - "ПСЖ" (Франция)

Биринчи беттештин жыйынтыгы - 0:4

Стадион: Барселона шаары, "Камп Ноу” стадиону.

Калыс: Дениз Айтекин (Германия)

Башталышы: 01:45 (Бишкек сааты боюнча).

4 гол айырмачылык менен жеңилген “Барселона” намыс үчүн кантип ойнойт деп суроо салгандар арбын. Бул оюнда Лео Месси сыйкыр футболун көрсөтүп, командасын чейрек финалга сүйрөп чыга алат болду бекен? Каталондук клубдун дагы бир чабуулчусу Неймар бул оюнда эки гол киргизем деп убада кылды. Ал эми “Барселона” күйөрмандары “ПСЖ” өз үйүндө 4 гол киргизе алса, демек, биз 5 гол киргизебиз деп ишеним артып турган чагы. Биринчи мүнөттөн тарта каталондук клуб чабуулга өтөрү белгилүү. Эдинсон Кавани баштаган париждиктер 90 мүнөт бою коргонууда гана жата бербеси да белгилүү.

"Боруссия Д" (Германия) - "Бенфика" (Португалия)

Биринчи беттештин жыйынтыгы - 0:1

Стадион: Дортмунд шаары, "Сигнал Идуна Парк” стадиону

Калыс: Мартин Аткинсон (Англия)

Башталышы: 01:45 (Бишкек сааты боюнча)

Дортмунддук клуб Лиссабондо өткөн беттеште гол жаратууга бир канча мүмкүнчүлүк жаратса да, “Бенфика” дарбазачысына гол киргизе алган эмес. Ошондогу Обамеянгдын таамай боло албагандыгы бул беттеште таасирин тийгизиши мүмкүн. Себеби коноктордун бир голу эки эсеге бааланат. Башкача айтканда, “Бенфика” 2:1 эсебинде утулса да, чейрек финалга жолдомо ала алат. “Боруссиянын” курамында Марко Ройс кайрадан жаракат алып, аталган оюнга чыга албайт. Жеңиштерге суусап турган Усман Дембеле, Кристиан Пулишич сыяктуу жаш футболчулар “Боруссияны” алдыга сүрөй алар бекен?