Түштүк Кореяда президенттин тарапташтары менен каршылаштарынын ортосунда кагылышуулар жүрүп жатат

Бүгүн, 10-мартта Түштүк Кореянын Конституциялык соту президент Пак Кын Хеге болгон импичментти кабыл алганына байланыштуу Сеулда башаламандык башталды. Учурда президенттин тарапташтары менен каршылаштарынын ортосунда кагылышуулар орун алууда. Алдын ала маалыматтарга ылайык, мындан улам 2 адам каза тапты.

Эскерте кетсек, өткөн жылы 9-декабрда өлкөнүн парламенти президенттин паракорлук ызы-чуусунан улам ага импичмент жарыялаган. Соттун чечими жергиликтүү YTN телеканалында бүгүн жарыяланган. Бардык 8 сот тең импичмент үчүн добуш беришкен.

Пак Кын Хе өлкөнү башкаруу кызматынан такыр бошотулат, 60 күндүн ичинде жаңы президент шайланышы керек. Эгер импичмент кабыл алынбаса, анын башкаруу мөөнөтү 2018-жылы бүтүп, президенттик шайлоо 20-декабрда болмок. Түштүк Кореянын президентинин айланасындагы жаңжал анын жакын курбусу Цой Сун Силь "мамлекеттин ишине кийлигишти" деп кармалгандан кийин тутанып, Пак Кын Хенин отставкасын талап кылган ири митингдер өткөн.

Учурда Цой Сун Силь камакта. Азырынча өлкө башчынын милдеттерин премьер-министр Хван Гё Ан аткарууда.