Калифорнияда тумшугу буралган ит кожоюн издейт

Таанышып койгула, бул иттин аты Пикассо. Ал баш сөөгүнүн түзүлүшү башкача төрөлүп, мутант иттердин катарына кирет. Пикассону күчүк кезинде кебетесинен чочулашып, Калифорниядагы «Портервилль» жолбун жаныбарлар баш маана кылуучу жайга өткөрүп салышкан. Аталган приют Пикассону өлтүрүлчү жандыктардын тизмесине кошуп салышат.

Чечимден кийин «Luvable Dog Rescue» компаниясынын адиси баш маананын ыктыярчысы аркылуу Пикассо жөнүндө угуп калган.

""Портервиллде" иштеген ыктыярчы Шеннон Корбит менен сүйлөшүп калдым. Физиономиясы өзгөчө болгон жаныбарлар болсо бергиле, алып кетип эксперимент жүргүзүп көрөлү десем, "таанышып алыңыз, Пикассо" деп сүрөт жөнөтүп жибериптир. Анын тумшугу буралып, үстүнкү жана астынкы жаактары бири-бирине дал келбей турат. Анын көздөрү аябай кайгылуу көрүндү. Ага боорум ооруп кабыл алууга мажбур болдум", - дейт ага ветеринардык кароо жүргүзгөн компаниянын адиси Лизл Уилхард.

"Шеннон менен суйлөшүп, кийинчерээк ошол эле баш маанада Пикассонун бир тууганы бар экенин билдим. Экөөнү бөлбөйлү деп чогуу алып кетүүгө арыз берип, алып чыгып кеттик. Учурда Пикассонун абалы жакшы. Мекемебизде көпкө чейин эле кармап турууну каалайм, бирок ит болсо дагы кожоюнга ээ болуп, бир үй-бүлөдө жашаса дейм", - дейт Л.Уилхард.