ТЕСТ: Кыргыздын чоңдору канча жылга кесилген?

Жогорку Кеңештин мурдагы төрагасы Ахматбек Келдибеков Бишкек шаардык сотунун чечими менен мамлекеттин эсебине 10 миллион сом төлөөгө милдеттендирилген. Ал Мамлекеттик салык кызматындагы ишинде жана Жогорку Кеңештин Москвадагы өкүлчүлүгүн ачуу ишинде “коррупция”, “кызмат абалынан кыянаттык менен пайдалануу” беренелери боюнча айыпталган. Прокуратура Келдибековду 10 жылга түрмөгө отургузууну суранган эле.

2015-жылы Туризм департаментинин мурунку директору Максат Чакиев 92 миң сом пара берип жаткан жеринен кармалган. Ал документтерди жасалмалоо жана пара берүү боюнча айыпталган. Биринчи Май райондук соту Чакиевди 6 жылга эркинен ажыраткан. Бишкек шаардык соту бул чечимди өзгөртүп, Чакиевди 3 жыл 6 айга эркинен ажыраткан. Ал эми Жогорку Сот аны камактан бошотуп, пара берүү боюнча гана айыптуу деп таап, ага 500 миң сом айып пул салган.

Өкмөттүн аппаратынын эл аралык кызматташтык бөлүмүнүн мурунку башчысы Алтынбек Муралиев Бишкек шаардык сотунун чечими менен 22 жылга эркинен ажыратылган. Ал “кызмат абалынан кыянаттык менен пайдалануу” жана “мамлекеттик чыккынчылык” беренелери боюнча күнөөлүү деп табылган.

Жогорку сот экс-депутат Урмат Аманбаеваны "кылмышка шериктеш болуу", "кызматтык абалынан кыянаттык менен пайдалануу" боюнча күнөөлүү деп таап, 3 миллион сом айып пул салып, абактан бошоткон. Буга чейин шаардык сот аны 9 жылга эркинен ажыратуу боюнча райондук соттун өкүмүн күчүндө калтырган эле. Экс-депутат "Ош облусундагы Кургак учук менен күрөшүү борборунун башкы эсепчиси болуп турганда мыйзамсыз иштерди жасап, мамлекетке 17 миллион 263,5 сом зыян келтирген" деп айыпталган.

2010-жылы 11-январда мурдагы коргоо министри жана Коопсуздук кеңешинин мурунку катчысы Исмаил Исаков 8 жылга эркинен ажыратылган. Ал "Коргоо министрлигине тиешелүү 2 бөлмөлүү батирди офицер уулуна берип койгон" деген айып менен Бишкек аскердик гарнизондук соту тарабынан генерал-лейтенанттык чининен ажыратылып, 8 жылга кесилип, сот залынан камакка алынган. Ал эми 2010-жылдын 7-апрелиндеги элдик ыңкылаптан кийин Исмаил Исаков боштондукка чыгып, сот тарабынан акталган.

2013-жылы Жогорку Сот "ата журтчу" депутат Камчыбек Ташиевди 1 жыл 5 айга эркинен ажыраткан. Судья Бишкек шаардык сотунун депутатты актаган чечимин толугу менен жокко чыгарып, Камчыбек Ташиевге карата Биринчи Май райондук сотунун өкүмүн өзгөртүп, "кылмышка шериктеш болуу" жана "бийликти басып алуу" боюнча күнөөлүү деп тапкан. Ага райондук сот чыгарган 1 жыл 6 айлык жаза өтөө мөөнөтү кыскартылып, 1 жыл 5 ай деп белгилеген.

“Ар-Намыс” партиясынын лидери, 4 жана 5-чакырылыштагы Жогорку Кеңештин депутаты Феликс Кулов “кызмат абалынан кыянаттык менен пайдаланган” деген берене боюнча 10 жылга эркинен ажыратылган. 2005-жылы 24-мартта элдик толкундоолордун натыйжасында ошол убактагы бийлик кулатылган соң Кулов түрмөдөн чыгарылып, үч күн бою Бишкекте тартипти орнотууга баш-көз болгон.

Нариман Түлеев "2008-жылы мэр болуп турганда Кытайдан автобустарды алып келүү иштеринде мамлекетке ири көлөмдө зыян келтирген” деп айыпталып, 2012-жылдын октябрь айында камакка алынган эле. 2013-жылы Бишкектин Ленин райондук соту аны коррупциялык иштер боюнча күнөөлүү деп таап, 11 жылга эркинен ажыраткан. 2016-жылы май айында Түлеевдин иши эки ирет мунапыска дал келип, ал сот тарабынан коюлган айыпты (келтирилген чыгымды) толугу менен төлөгөн соң эркиндикке чыккан.

2014-жылы Бишкек гарнизонунун Аскердик соту 2010-жылдагы Апрель окуясы боюнча Курманбек Бакиевди күнөөлүү деп таап, үй-мүлкүн конфискациялоо менен өмүр бою эркинен ажыраткан.