Huawei компаниясы жээги жок смартфон чыгаруунун үстүндө иштөөдө

Кытайлык Huawei компаниясы жээги (рамкасы) жок смартфонду чыгаруунун үстүндө иштөөдө. Бул тууралуу аталган компаниянын Керектөөчүлөр бөлүмүнүн башкы мүдүрү Ю Чэндун чет элдик басылмалардын бирине маек берип билдирген.

Маалыматка караганда телефондун үстүнкү бөлүгүн жалаң гана экран ээлейт. Жаңы телефондун качан чыгары азырынча белгисиз. Ошондой эле анын алдынкы камерасынын болор-болбосу да айтылган эмес.

Белгилей кетсек, Huawei 2016-жылы 139 миллион смартфон саткан. Ал эми 2016-жылдын аягында экранынын диагоналы 5,09 дюйм, дисплейи оң жана сол жактарга ийилип турган Honor Magic телефонун иштеп чыккан. Учурда жасалып жаткан смартфондун төрт тарабында тең жээктери болбойт.

Буга чейин Xiaomi Mi Mix, LG G5, LG G6 телефондору ичке рамкасы менен чыккан. Ошондой эле жакында чыга турган Samsung Galaxy S8, Galaxy S8 Plus смартфондору дагы ушундай өзгөчөлүккө ээ болору айтылган.