"Кыргызстан сулуусу-2017" сынагынын катышуучусу аны финалга катыштырбай койгонун айтып чыкты

"Кыргызстан сулуусу-2017" сынагынын катышуучусу Алтынай Абдымомунова аны сынактын финалына катыштырбай койгонун бүгүн, 6-апрелде SUPER.KG`ге билдирди.

21 жаштагы Алтынай Абдымомунова Бишкектеги жогорку окуу жайлардын биринде окуйт, өткөн жылы да сулуулар сынагына катышкан. Бул жылы "Кыргызстан сулуусу-2017" сынагына катышып, өзүн сынап көрүүнү чечкен. Бирок сынак эртең болот деген күнү уюштуруучу финалга катышпаарын айткан.

"Ал күнү мен бий тапшырмасына тиктирген формамды башка көйнөктөрүмдү алып, чач жасалга, макияж жасатып даярданып келгем. Атайын даярдалган күзөтчү мени ичкериге киргизбей койду. Эмне үчүн киргизбей жатканын түшүндүргөн да жок. Көрсө, мени "кара тизмеге" киргизип коюшуптур. Ыйлап, Таттыбүбүнү (сынактын уюштуруучусу Таттыбүбү Самидин кызы) чакырттым. Сынак ортолоп калганда ал чыгып, мага кыйкырып, адепке сыйбаган жорук көрсөтүп кирип кетти.

Мен ал сынакка канча даярданып, көп акча каражатын, эмгек, убакыт короттум. Анын баарын ата-энем төлөгөн. Алардын алдында уятка калдым", - дейт А. Абдымомунова.

Ошондой эле ал сынактын билеттерин ар бир катышуучу сатышы зарылдыгын, 4 күн калганда 30 билетти саткыла деп бергенин айтат. Бирок мындай нерсе келишимде көрсөтүлгөн эмес.

"Таттыбүбү 1-апрелде 500 сомдон саткыла деп 30 даана билет берип, "ким сата албаса, сынакка кирбейт" деди. Менде анын "катышуучу өз чөнтөгүнөн билеттин акчасын берсин" деп айтканы жазылган запись сакталуу. Мен аз эле билет сатканга жетиштим. Катышуучулардын көбүнчөсү баарын сата алышкан жок, бирок уюштуруучу мени гана катыштырбай койду", - дейт.

Бул окуя боюнча экинчи тарап болгон уюштуруучуларга байланышуу аракетин кылдык. Мүмкүнчүлүк жаралса экинчи тараптын оюн да угуп жарыялоого даярбыз.

Белгилей кетсек, жогоруда айтылган сынактын финалында Бегимай Карыбекова "Кыргызстан сулуусу-2017" аталган.