ЖЫЛНААМА, 7-АПРЕЛЬ: "2010-жылдагы апрель окуясынан кийин бир топко чейин туулган күнүмдү белгилегим келбей жүрдү" дейт ырчы Назира Токонова

Ырчы Назира Токонова бүгүн, 7-апрелде 29 жашка толду. Ырчыны куттуктап байланышка чыксак, SUPER.KG порталына ыраазычылыгын айтты.

"Туулган күнүмдү сонун маанайда тосуп алдым. Эртең менен уктап жатсам, бирөө чалып, "7-майда концерт өткөрмөкпүз, азыр эле чакырып, айтып коёлу деп жатабыз" деди. Мен толук ойгоно албай эле айткандарынын баарына макул дей бериптирмин. Соңунда радиодон чалып жатышканын, тамаша экенин билдирип, куттукташты. Жакындарым кечээ эле куттукташып, белектерин беришкен. Өздүк майрамымды жылдагыдай эле курбуларым менен бирге белгилейин деп жатам.

2010-жылдагы апрель окуясынан кийин бир топко чейин туулган күнүмдү белгилөөгө көңүлүм келбей жүрдү. Анан дагы апама тамашалап "мени эмнеге 7-апрелде төрөдүңүз эле" деп айтып калчумун", - дейт күлүп.

Белгилей кетсек, Назира Токонова 1988-жылы 7-апрелде Сокулук районунда жарык дүйнөгө келген. Ата-энесинин каршылыгына карабай, Калый Молдобасанов атындагы Улуттук консерваторияга тапшырып, 2 жыл даярдоо курсунда, 5 жыл эл аспаптар факультетинде окуган. Чыгармачылык жолуна 2007-жылдары аттанган. 2013-жылдан тарта Сокулук маданият үйүнүн солисти, билим берүү борборунда вокалдан студенттерге сабак берип иштеген. Репертуарындагы белгилүү ырлары "Сага", "Сагыныч", "Сүйбө мени" жана Чыңгыз Турдубеков менен биргеликте аткарган "Мезгил учат" чыгармасы.

7-апрелге карата жылнаама.