Актёр жана режиссёр Назым Мендебаиров Кыргыз улуттук драма театрынын директору болду

Актёр жана режиссёр Назым Мендебаиров Т. Абдымомунов атындагы Кыргыз улуттук драма театрынын директору болуп дайындалды. Маалыматты 10-апрелде Маданият, маалымат жана туризм министрлигинин басма сөз кызматы ырастады.

Айта кетсек, буга чейин аталган театрды Кыргыз эл артисти Темирлан Сманбеков жетектеп келген.

Назым Мендебаиров 1973-жылы 15-октябрда Жумгал районунун Чаек айылында туулган. Режиссёр Рысбек Жабиров менен биргеликте "Достор", жеке өзү "Кайып булак", "Дудук кыз", "Жубайлар", "Кемпир" тасмаларын тарткан. Мындан сырткары актёр катары "Кара кыз", "Чиркин өмүр", "Апамдын махабаты", "Кара жолтой", "Ысык-Көлдүн бешбармактары", "Троллейбус", "Уурунун махабаты", "Президент жана бомж" фильмдерине тартылган. Кыргызстан жаштар сыйлыгынын лауреаты.