Чүй ОИИББи: "Боинг кулаган айылдын тургуну алдамчылыкка шектелип кармалды"

Бүгүн, 18-апрель күнү учак кулаган айылдын тургундары жер маселесин чечип берүү боюнча Ак үйдүн алдына митингге чыгышмак. Бирок аба ырайына байланыштуу митинг башка күнгө жылдырылган. Айрым интернет колдонуучулары "ИИМдин жана УКМКнын кызматкерлери митингдин уюштуруучуларын кармап жатышат" деп жазышкан. Ал эми Капар аттуу жергиликтүү тургун, митингдин уюштуруучуларынын бири Дөлөн Ормонбековду үч күн мурун милиция кармап кеткенин билдирди. Бул тууралуу Чүй облустук ички иштер башкы башкармалыгына кайрылганыбызда, ал жаран алдамчылыкка шектелип кармалганын билдиришти.

"Бүгүн учак кулаган айылда митинг болду. Ал жерде милиция кызматкерлери коомдук тартипти сактап турушту. Бирок эч кимди кармашкан жок. Ал эми Дөлөн Ормонбеков 14-апрелде эле кармалган. Ал алдамчылыкка шектелип "коомдук бирикменин 90 миң сомго жакын акчасын жеп салган" деп айыпталууда. Учурда ал Сокулук РИИБинин убактылуу кармоочу жайында", - деп билдиришти Чүй ОИИББинен.

Буга чейин Боинг кырсыгы болгон айылдын тургундары Ак үйдүн алдында митингге чыгышып, жер маселесин чечип берүү талабын коюшкан.

Эске сала кетсек, 16-январда Чүй облусундагы Аэрофлот дачалык тилкесине Түркиянын жүк ташуучу учагы кулап түшүп, кырсыктын кесепетинен 34 Кыргыз жараны жана 4 экипаж мүчөсү каза тапкан. Кийин кырсыктан жабыркаган 1 адам ооруканадан каза таап, жалпы каза тапкан Кыргыз жарандарынын саны 35ке жеткен.