Филипп Киркоров "Евровидение" сынагына Орусия катышуудан баш тартышы керек экенин айтып чыкты

"Евровидение" музыкалык сынагынын уюштуруучулары добуштардын жыйынтыгын эсептөө эрежелерин өзгөртмөйүнчө, Орусия катышуудан баш тартышы абзел. Мындай пикирин аталган өлкөнүн эл артисти Филипп Киркоров ТАССка берген маегинде билдирген.

"Юлия Самойлова менен болгон окуяга чейин эле мен сынактын эрежелери өзгөрмөйүнчө, ага катышуунун зарылдыгы жок деп эсептечүмүн. Себеби миллион көрүүчүнүн добушу 5 калыстын берген баасына теӊ келе албайт. Өз акчалары менен добуш берген адамдар 2016-жылы Сергей Лазаревди биринчи орунга коюшту, а калыстар тобу акыркы орунга. Эгерде сынактын эрежелерин өзгөртпөй, көрүүчүлөрдүн добуштары гана эсепке алынганда, "Евровидение" кайрадан бизде өтмөк", - деген ырчы.

Анын айтымында, көрүүчүлөрдүн жана калыстардын берген добушунун пайыздык катышы 70:30 же 80:20, көрүүчүлөрдүн пайдасына болушу зарыл.

Белгилей кетсек, бул жылы эл аралык сынакка ден соолугунун мүмкүнчүлүгү чектелген Юлия Самойлованын катышары белгилүү болгон. Бирок Украина ырчы бир нече эрежелерди бузган деген шылтоо менен аны аталган өлкөгө кирүүсүнө тыюу салган.