Кыргыз спортчулары Москвадагы түнкү клубда кыздарды коргоп, мушташка түшүштү

Кыргыз спортчулары Москвадагы түнкү клубда кыздарды коргоп, мушташка түшүштү. Бул тууралуу чет элдик басылмалар жазып чыгышты.

Маалыматка караганда, 19 жаштагы Низам Жунус уулу жана 23 жаштагы Бекболот Абдылда уулу аттуу кыргыз мушкерлери 22-апрелде Орусиянын Курск шаарында өтө турган аралаш күрөш искусствосу боюнча "Битва титанов" турнирине катышууга чакыруу алышкан. Анда башкы жекеме жеке чыгууга ММА ардагери Жефф Монсон менен Максим Новосёлов катышмак. Кыргыз спортчулары мелдешке даярдык көрүү үчүн машыгууга акча табууну көздөп, Москвадагы түнкү клубдардын бирине кароолчу болуп жумушка орношкон.

18-апрелден 19уна караган түнү клубга келген коноктордун бир тобу кыздарга тийише баштаган. Мындан улам кыргыз жигиттери аларга эскертүү беришкен. Бирок алкоголдук ичимдиктерди көп ичип алган эркектердин тобу алардын сөзүн укпай бийлөөчү аянтка кыздарды сүйрөп чыга баштаган.

"Биз үчүн кыздардын абийири, ар-намысы бийик тургандыктан, мушташа кеттик. Уруштан кийин бирөө эс-учун жоготуп койду, экинчисинин муруну сынды. Көп өтпөй полиция кызматкерлери бизди алып кетишти. Биз кылгандарыбызга өкүнгөн жокпуз. Өзүн эркек деп эсептеген ар бир адам ушундай кадамга бармак", - деп билдирген 19 жаштагы Низам Жунус уулу.

Окуядан кийин спортчулар 2 күн тартип сакчыларынын имаратында болушкан. Андан кийин сабалган адамдар арызын алышып, кыргыздар бошотулган.