ЖЫЛНААМА, 25-АПРЕЛЬ: Мындан 89 жыл мурун СССРдин Эл артисти Юрий Яковлев туулган

Мындан 89 жыл мурун, 1928-жылы 25-апрелде советтик актёр Юрий Яковлев Москвада туулган. Аны алгач ВГИКке (Бүткүл союздук кинематография институту) "киного жарабайсың" деп албай коюшкан. Актёр болуу тилеги күч жигит Щукин атындагы театралдык училищеге тапшырат. Ал жактан 1-курста актёрдук чеберчиликти "2" деген баага аяктагандыгына байланыштуу окуудан айдалмакчы болгондо мугалиминин "бул жигитти оңдойм" деген кепилдиги менен калат. Андан соң Вахтанг атындагы Академиялык театрды аяктап, 1953-жылы актёрлук карьерасын баштаган.

Юрий Яковлев тартылган тасмалары – "Иван Васильевич кесибин өзгөртөт" (падыша Иван Грозный), "Тагдырдын тамашасы же жеңил парыңыз менен!", "Тагдыр тамашасы. Уландысы" (Ипполит) жана башкалар.

Жараткан ролдору үчүн Юрий Яковлевге 1976-жылы СССРдин Эл артисти наамы берилсе, 1979-жылы СССРдин Мамлекеттик сыйлыгынын лауреаты, 1988-жылы Ленин ордени, 1995-жылы РФнын Мамлекеттик ордени жана башка сыйлыктарга ээ болгон.

Актёр 2013-жылы 30-ноябрда 85 жашында көпкө созулган дарттын айынан ооруканада каза тапкан.

25-апрелдин жылнаамасы.