"Дыйкан" базарынын соодагерлери Москва-Фучик көчөлөрүнүн кесилишинин толугу менен жабылышына каршы чыгышты

Бүгүн, 27-апрелде "Дыйкан" базарынын соодагерлери Москва-Фучик көчөлөрүнүн кесилишинин толугу менен жабылышына каршы чыгышты. Соодагерлердин айтымында, аталган кесилиш былтыр эле 14 миллион сомго оңдолгон. Быйылкы оңдоо иштери кимдир-бирөөнүн кызыкчылыгы үчүн экенин, бул кесилиш аркылуу базардын кардарларынын басымдуу бөлүгү келерин айтышууда.

"Жолду оңдосо оңдой беришсин. Ага каршы эмеспиз. Бирок толугу менен жолду тосуп албай, бир тарабын ачып коюшса болот да. Базарга көп адамдар ушул жол аркылуу унаалар менен келишет. Жол жабылып калса, алар кантип өтүшөт. Бул бизге чоң зыянын тийгизип жатат", - дейт соодагер Гуля Курамаева.

Жолду тостурууга каршылык көрсөткөн 100дөй соодагерди 50дөй милиция кызматкери көзөмөлдөп турушту. Соодагерлер төгүлгөн шагылды тазалап, жолду ачып салышты.