Актан Арым Кубаттын "Кентавр" тасмасы Бельгияда өткөн фестивалда баш байгени алды

Актан Арым Кубат режиссёрлук кылган "Кентавр" тасмасы Бельгияда болуп өткөн "MOOOV" кинофестивалында баш байгени алды. Бул тууралуу SUPER.KG`ге бүгүн, 2-майда тасманын продюсери Алтынай Койчуманова билдирди.

"Баш байгени алганыбызды биз да кечээ билдик. Фестивалга фильмдин режиссёру катышты. Байге акчалай сыйлык иретинде жана тасманы Бельгия, Нидерланды, Люксембургда прокатка чыгаруусуна кепилдик берет экен. Режиссёр бүгүн учуп келет, ошондо бул тууралуу толук маалымат алууга болот. Ал эми аталган өлкөлөрдө "Кентавр" тасмасы 2018-жылдын жаз мезгилинен тарта прокатка чыгат", - дейт продюсер.

Фестиваль 18-апрелден 30-апрелге чейин өткөнүн, "Кентавр" тасмасын көрүүчүлөр жылуу кабыл алышканын Алтынай Койчуманова кошумчалады.

Белгилей кетсек, 26-мартта Берлинде дүйнөлүк премьерасы өткөн, коомчулукта чуу жаратышы мүмкүн делген "Кентавр" тасмасынын улуттук премьерасы болуп өткөн.