Криштиану Роналду спортсмендер жана эркектер арасында Instagram баракчасына 100 миллион адам жазылган алгачкы адам

Дүйнөдөгү эң белгилүү футбол жылдыздарынын бири, Португалиянын жана “Реал Мадрид” футболдук клубунун оюнчусу Криштиану Роналду Instagram социалдык тармагында 100 миллион жазылуучуларды топтогон алгачкы спортсмен болду. Бул тууралуу Британиялык Mirror басылмасы жазып чыкты.

Муну менен катар Криштиану Роналду "эркектер арасында 100 миллион жазылуучуларды топтой алган жалгыз Instagram колдонуучусу" аталды. Роналдунун кымбат баалуу унаа менен түшкөн сүрөтү эң көп каралып, көп талкууга түшкөн. Ушул эле сүрөткө 4 миллион колдонуучу "жакты" белгисин калтырган. Роналду Instagram баракчасына 1 768 сүрөт жарыялаган ал сүрөттөрдүн ар бири орточо 56,5 миң адамдын жазылуусуна себеп болгон.

Бул жаатта Роналдунун негизги атаандашы болуп каталондук “Барселона” футболдук клубунун чабуулчусу бразилиялык Неймар эсептелинет. Анын Instagram баракчасына 74 миллион колдонуучу жазылган.

Бул убакытка чейин Instagram баракчасына 100 миллион адам жазылгандар: Селена Гомес (119 миллион), Ариана Гранде (104 миллион), Тейлор Свифт (101 миллион) жана Бейонсе (101 миллион).