Киевде "Евровидение-2017" сынагы башталып, катышуучулар кызыл килемден өтүштү

Кечээ, 7-майда Украинанын Киев шаарында "Евровидение-2017" эл аралык сынагы башталып, катышуучулар кызыл килемден өтүштү. Бул жылы кызыл килем сынактын тарыхында эӊ узун болгону айтылууда. Анын узундугу 265 метрди түзгөн.

Мурда айтылган маалыматтарга караганда, сынактын сахнасын дизайнер Флориан Видер иштеп чыккан. Салмагы 30 тоннаны түзүп, көрүүчүлөр үчүн 7 миӊ орун, анын ичинде 50 орун ден соолугунун мүмкүнчүлүгү чектелгендер үчүн болгон.

Сынактын жарым финалдары 9-майда жана 11-майда өтсө, финалы 13-майда өтөт.

"Гиннесстин рекорддор китебине" ылайык, эӊ узун кызыл килем 2014-жылы Германияда төшөлгөн. Ал 5 чакырым 35 метрге чейин созулган.

Белгилей кетсек, бул жылы сынакка Орусиянын атынан Юлия Самойлова катышмак болгон. Бирок кийинчерээк Украина бийлиги ырчыга аталган өлкөгө кирүүгө 3 жылга чейин тыюу салган.