Киевде "Евровидение-2017" сынагынын биринчи жарым финалдын жеӊүүчүлөрү аныкталды

"Евровидение-2017" эл аралык сынагынын биринчи жарым финалынын жеӊүүчүлөрү бүгүн, 10-майга караган түнү Украинанын Киев шаарында аныкталды. Сынактын расмий сайтындагы маалыматка ылайык, анда Молдавия, Азербайжан, Греция, Швеция, Португалия, Польша, Армения, Австралия, Кипр жана Бельгиядан келген катышуучулар жеӊүүчү аталышкан.

Бул күнү жалпы18 өлкөнүн өкүлдөрү талантын көрсөтүшкөн. Ал эми Албания, Чехия, Финляндия, Грузия, Исландия, Латвия, Черногория жана Словения сынактын кийинки баскычына өтө алышкан эмес.

Финалисттерди аныктоо 2 баскыч менен өтүүдө. Алгач калыстар башкы даярдыктан соӊ өз бааларын коюшса, көрүүчүлөр шоу учурунда добуштарын беришкен.

Эске салсак, "Евровидение-2017" сынагынын ачылышы 7-майда Киевдеги "Парковый" деп аталган көргөзмө борборунда өткөн. Экинчи жарым финал эртеӊ, 11-майда өтөт. Ал эми жеӊүүчү аныкталчу финал 13-майга пландалган.