МЕДИА-ПОРТАЛ: "Кызыл гүлүм, ай" ырынын клибин тартууда Анжелика экөөбүз дээрлик уктаган жокпуз" дейт Дайыр Исмадияров

2016-жылдын 9-декабрында Бишкектеги Спорт Ордосунда SUPER.KG порталынын 10 жылдыгына карата өткөн концертте ырчылар Анжелика менен Дайыр Исмадияров "Кызыл гүлүм, ай" ырын атайын жаздырып, бирге аткарышкан. Бүгүн, 11-майда Дайыр Исмадияров аталган ырга тартылган клип жөнүндө буларды билдирди.

"Алгач кайсы ырды чогуу аткарсак деп ойлондук. Мен эски ырларды аткарууну сунуштадым, Анжелика "Кызыл гүлүм, айды" ырдап чыгууну айтып калды. Ырдын аранжировкасы мурун эле жазылган экен. Кайсы бир ырчы акчасын бербей ырдап жүрө бериптир. Бизге жаккандыктан суранып, аны Эдил Маматовдон сатып алып, бир аз өзгөртүп ырдап чыктык.

Кызыл гүл жөнүндө ырдап жаткандыктан сюжети жок, трек клип тартууну чечтик. Буга чейин Москвадагы студияларда бир нече жолу клип тарттырып, тажрыйбам болгондуктан ошол жактан клип тарттык.

Ишенесиздерби, клип тартабыз деген күнү дээрлик уктаган жокпуз. Таӊкы саат 4кө чейин концерт коюп, кайра 6да съёмка башталды. Буга чейин Анжелика менен саламдашуудан ары өтпөгөн болсом, бул ирет бири-бирибиздин кандай адам экенибизди билдик. Анын убакытка тактыгына, мээнеткечтигине баа бердим. Сиздердин концерт болбосо, бул чыгарма жаралбайт эле. Андыктан ушундай мүмкүнчүлүк түзүп берген сиздерге ыраазычылык билдирем", - дейт Дайыр Исмадияров.

Ал эми клипке карата айтылган сын-пикирлер тууралуу мындай дейт:

"Кийимдерин эле көрсөтө бериптир" дегендер боюнча айта кетсем, негизи ар бир ырдын маани-маӊызына карап, атайын формалар тандалып алынат.

Ар бир адамдын пикири бар, кээ бирөө жактырса, башкасы жактырбайт дегендей. Албетте, клиптин кемчиликтери да бар. Бирок жалпысынан өзүбүздүн купулубузга толду".

Дайыр Исмадияров менен Анжеликанын "Кызыл гүл" ырынын клибин бул жерден көрүӊүз.