Ислам тилектештик оюндары: Кыргыз өлкөсү жалпы медалдык эсепте 12-орунда келе жатат

Азербайжандын Баку шаарында өтүп жаткан Ислам тилектештик оюндарында Кыргыз өлкөсү жалпы медалдык эсепте 2 алтын, 2 күмүш жана 4 коло медаль менен 12-орунда келе жатат. Бул тууралуу мелдештин расмий сайты билдирет.

Медалдык эсепте 1-орунда 137 медаль менен Түркия курамы келе жатат, анын эсебинде 54 алтын, 45 күмүш жана 38 коло медаль бар.

2-орунда үй ээси Азербайжан, анын капчыгында 99 медаль бар, анын ичинен 50 алтын, 29 күмүш жана 20 коло медалдар.

3-орунда жалпы эсеби менен 54 медалдын ээси Иран курамы, анын капчыгында 14 алтын, 17 күмүш жана 23 коло медаль бар.

Кыргыз спортчулардан алтын медалды грек-рим күрөшүндө Каныбек Жолчубеков, дзюдо боюнча мелдеште Юрий Краковецкий жеңди. Күмүш медалдардын ээси грек-рим күрөшүндө Руслан Царев менен Үзүр Жусупбеков болду. Коло медалды суучул Дарья Таланова, дзюдочу Отар Бестаев, Бектур Рысмамбетов жана Владимир Золоев утуп алды.