Мурдагы депутат Садыр Жапаровдун иши сотко жөнөтүлдү

Башкы прокуратуранын маалыматына караганда, 24-май күнү Бишкек шаарынын Биринчи Май райондук сотуна мурдагы депутат Садыр Жапаровдун иши жөнөтүлдү. Буга чейин УКМК Садыр Жапаровдун ишин тергеп бүтүп, Башкы прокуратурага жөнөткөн болчу.

Эскерте кетсек, 25-мартта Садыр Жапаров Казакстандан Кыргыз мамлекетине киргенде аны чек арадан УКМКнын кызматкерлери кармап кеткен. Ал "бейбаштык", "бийлик өкүлүнө карата зордук-зомбулук көрсөтүү", "барымтага алуу" жана башка беренелер боюнча айыпталууда. 26-мартта Садыр Жапаров Биринчи Май райондук сотунун чечими менен тергөө бүткүчө Бишкектеги №1-тергөө абагына камалган. 6-апрелде Бишкек шаардык соту райондук соттун чечимин күчүндө калтырган. Ал эми 24-апрелде Бишкектин Биринчи Май райондук соту Жапаровду камакта кармоо мөөнөтүн 28-майга чейин узарткан. Бул чечимди Бишкек шаардык соту күчүндө калтырган болчу.