Кыргыз футболчусу Валерий Кичин Орусиянын биринчилигинин Премьер-Лигасында ойногонго бир кадам жакындады

Футбол боюнча Кыргыз өлкөсүнүн улуттук курама командасынын коргоочусу Валерий Кичин “Енисей” клубу менен 25-май күнү Орусия биринчилиги Премьер-Лигага чыгуу үчүн алгачкы плей-офф беттешинде “Арсенал Туланы” өз үйүндө кабыл алып, 2:1 эсебинде жеңди. Анда 1-таймдын башталышында “Арсеналдын” оюнчусу өз дарбазасына гол киргизип, эсеп саны ачылган.

Оюндун 72-мүнөтүндө “Арсеналдык” Думбиянын алыстан узатылган көтөрүп берүүсүн Кирилл Комбаров ийгиликтүү жыйынтыктап эсепти теңдеди. Кичиндин командасы оюндун акыркы мүнөттөрүндө чабуул жасап эсеп санын 2:1 кылганга үлгүрдү.

Валерий Кичин негизги курамда чыгып беттештин аягына чейин оюн жүргүздү. Оюн бүткөн соң “Енисей” командасына Орусиянын Улуттук футболдук Лигасында 3-орунду ээлеген үчүн коло медалдары тапшырылды. Эки команданын жооптук беттеши 28-май күнү Тула шаарында орун алат.