АФК Кубогу: "Алай" "Дордойду" 5:4 эсебинде жеңди

Бүгүн, 31-май күнү АФК Кубогунун 6-турунун алкагында Ош шаарында жергиликтүү "Алай" бишкектик "Дордойду" кабыл алды. Оюн А.Сүйүнбаев атындагы стадиондо өтүп, голдорго бай болду.

Оюндун 10-мүнөтүндө "Дордойдун" жарым коргоочусу Ислам Шамшиев эсепти ачса, 26-мүнөттө Алишер Азизов экинчи голду киргизди. Бул мүнөттөрдө үй ээлери чабуулун күчөтүп баштады. Жыйынтыгында Тухтасинов менен Ахмедов эсепти тең кылышты. Оюндун соңуна чейин эки команда чабуулун токтотпой, голго гол менен жооп кайтарып жатышты. "Алайдан" Модибо Сидибе, ал эми "Дордойдон" Кайрат Жыргалбек уулу эки жолудан айырмаланганга үлгүрүштү. Жеңиштүү голду үй ээлеринин капитаны Ильяз Алимов киргизип, 5:4 эсебин каттады.

Бул оюн менен эки кыргыз клубунун АФК Кубогундагы жүрүшү аяктады. Тайпада "Алай" 3-орунга көтөрүлсө, "Дордой" 4-орунда калды. “Истиклол” менен “Алтын-Асыр” 13 упайдан чогултуп, чейрек финалга чыгуу жолдомону өз ара талашышат.