Конфедерациялар Кубогу: Португалия менен Мексика тең чыгышты

Орусияда өтүп жаткан Конфедерациялар Кубогунда "А" тайпасында экинчи оюн Казань шаарында орун алды. Анда Европа чемпиону Португалия Мексика менен 18-июнда кез келди.

Роналду баштаган курама команда "чү" дегенде эле чабуулга өттү. 21-мүнөттө Пепе кошумча сокку узатып, эсепти ачкандай болгон. Бирок калыстарга жардамчы иретинде пайдаланыла баштаган видеокайталоо бул учурда офсайд катталганын билдирди.

35-мүнөттө Роналдунун пасынан Куарежма эсепти ачты.
Мексикалыктар чабуулун күчөтүп, команда лидери Чичарито 41-мүнөттө эсепти 1:1 кылды.
Экинчи бөлүктө португалиялык Соареш 86-мүнөттө гол киргизсе, Морено бурчтан берилген пасты голго айландырды.
Эсеп 2:2, эки команда бирден упайга ээ болушту.
Эске салсак, кечээ ушул тайпадагы Орусия менен Жаңы Зеландиянын оюну 2:0 эсебинде аяктап, үй ээлери жеңишке жетишкен.