Белгилүү ырчы Мадонна сүйүктүүсү үчүн АКШдан көчүп кетери айтылууда

Америкалык ырчы Мадонна АКШны таштап Португалияга көчүп кетет. Бул тууралуу чет өлкөлүк массалык маалымат каражаттары жазып чыгышты. Мунун биринчи себеби ырчынын 12 жаштагы бакма уулу Дэвиддин кыялын орундатуу болсо, экинчиси – жаңы сүйүктүүсү Кевин Сампайонун жанында жашоо экени айтылат.

Португалиялык басылмалар билдиргендей, ырчы аталган өлкөдөн 18-кылымдарда салынган 6 миллион евролук особнякты сатып алган. Аталган үйдүн жанында жергиликтүү "Benifica" футбол командасынын машыктыруучу базасы жайгашкан. Ал эми ырчынын уулу Дэвид аталган команданын күйөрманы жана келечекте футболчу болууну самайт.

Мадоннанын сүйүктүүсү делген Кевин Сампайо 31 жашта, португалиялык модель. 58 жаштагы ырчы менен бир жыл мурун ырчынын "Bitch, I am Madonna" ырынын клибине тартылып жатканда таанышкан.