Англиялык "Ливерпуль" футбол клубу Мохаммед Салахты 42 миллион еврого сатып алды

Англиялык "Ливерпуль" италиялык "Романын" жарым коргоочусу Мохаммед Салахты 42 миллион еврого сатып алды. Бул тууралуу маалыматты "Ливерпуль" өзүнүн официалдуу сайтына жарыялады. 25 жаштагы египеттик футболчу 2022-жылга чейин аталган клуб менен келишимге кол койду. Ал мерсисайддык командага быйылкы трансфердик мезгилде кошулган алгачкы футболчу.

"Ливерпуль" Салахка 11 катар номерин ыйгарды. Бул тууралуу Салах "Мага ордун бошотуп берген клубдашым Роберто Фирминого рахмат. Мен 11-номерди жакшы көрөм. Ушул номер менен "Ромада" ойнодум, Египеттин курамасында 11 менен жүрдүм. Бул үчүн рахмат дешим керек", - дейт. Ал эми Фирмино 9-номерде ойнойт.

Мохаммед Салах "Романын" курамында кезинде 2016-2017-жылкы сезондо 41 оюн өткөрүп, 19 жолу айырмаланып, 15 голдук пас чыгарган.