Орус теннисчиси Мария Шарапова өмүр баяны жөнүндө аудиокитеп жаздырды

Орусиялык теннисчи Мария Шарапова басып өткөн жолу тууралуу аудиокитеп даярдады. Бул тууралуу ал өзүнүн социалдык тармактагы баракчасына жазып чыккан.

“Өмүр баяным тууралуу кыскача маалыматты аудиокитепке жаздырып бүттүм. Буга 3 күн 20 сааттан ашуун убакыт кеткени менен, мен үчүн бүт өмүрүм корогондой туюлду” деген ал.

Маалым болгондой, спортчунун англис тилиндеги “Ээ-жаа бербеген” деген аталыштагы китеби ушул жылдын 12-сентябрынан тарта сатыкка чыгат. Китепте теннисчинин Сибирде өткөн балалыгынан тарта азыркы ийгиликтерине чейин баяндалып, баасы болжол менен 28 долларды түзмөкчү.

Эске салсак, Чоң шлем түркүмүнө кирген мелдештерде 5 ирет жеңүүчү аталган Мария Шарапова 2016-жылы эл аралык теннис ассоциациясы тарабынан “мельдоний колдонгон” деп айыпталып, 15 айга спорттон четтетилген.

Үстүбүздөгү жылдын 26-апрелинде мөөнөтү бүтөрү менен Штутгартта WTA турниринин 1-айлампасына "уайлд кард" менен катышуу мүмкүнчүлүгүнө ээ болуп, атаандашы италиялык Роберта Винчини утуп алган.