Криштиану Роналду 1 ай мурун төрөлгөн эгиз балдарына учуп кетип, Конфедерациялар Кубогунда ойнобой калды

Орусияда өтүп жаткан Конфедерациялар Кубогунун 3-орунга болгон беттешинде Португалия курамы Криштиану Роналдусуз ойнойт. Бул тууралуу чет өлкөлүк басылмалар маалымдайт.

Криштиану Роналдунун июнь айынын башында эгиз балдары төрөлгөнү тууралуу айтылып келген. Португалиянын Футбол федерациясынын айтымында, ал балдары төрөлгөнү жөнүндө Кубокко даярданып жатканда билдирип, бирок курама команда менен калууну чечкен.

“Мен балдарымдын төрөлгөнүн билип туруп, Португалия курамасы менен аягына чейин болдум. Финалга чыкпай калганыбыз өкүнүчтүү, бирок биз өз күйөрмандарыбызды кубантканга даярбыз. Башкы машыктыруучунун жана Португалия футбол федерациясынын президентинин мага кылган мамилесин унутпайм, алар чындап мени кубантышты. Өз балдарым менен жолугушуумду чыдамсыздык менен күтөм", - деген Криштиану Роналду эгиздерине учуп кеткендигине байланыштуу, 3-орунга болгон оюнда ойной албайт.

Эске салсак, Португалия курамасы жарым финалдык беттеште Чили курамасына пенальтилер сериясында жеңилип калган.