"Реал Мадриддин" коргоочусу Пепе түркиялык "Бешикташка" өттү

Испаниялык "Реал Мадрид" клубунун коргоочусу Пепе (толук аты-жөнү Кеплер Лаверан Лима Феррейра) аталган клубда түзгөн келишими соӊуна чыгып, эми түркиялык "Бешикташ" клубуна өттү. Бул тууралуу чет өлкөлүк басылмалар маалымдайт.

Маалыматтарга караганда, 34 жаштагы португалиялык футболчу "Бешикташка" эркин өкүл катары келген. Башка футболчуларды көбүнчө сатып алышса, Пепе "бекер" келди. Келишим 2 жылга түзүлүп, анда ал 12 миллион евро акча табары айтылат.

Белгилей кетсек, Пепе "Реал Мадрид" клубунда 2007-жылдан баштап ойноп баштаган. Анда футболчу 229 оюнга катышып 15 гол киргизген. “Реал Мадрид” клубу менен Пепе 14 трофей уткан, алардын ичинде Испания чемпиондугу (3 жолу), Испания Кубогу (2 жолу), Испаниянын Суперкубогу (2 жолу), Чемпиондор Лигасы (3 жолу), УЕФАнын Суперкубогу (2 жолу) жана Клубдар арасындагы Дүйнөлүк чемпионат (2 жолу).