«Ва банк» сериалы менен атагы таш жарган Соң Хе Кйо турмушка чыгат

Түштүк Кореянын белгилүү актрисасы Соң Хе Кйо ушул жылдын 31-октябрында аталган эле өлкөнүн актёру Соң Жуң Киге турмушка чыгат. Бул тууралуу маалыматты эки атактуунун өкүлдөрү кечээ, 5-июль күнү жалпыга маалымдоо каражаттарына тастыкташты. Актёрлордун агенттиктери биргелешип тараткан маалыматта минтип жазылат: “Никеге туруу оңой иш эмес, бул эки үй-бүлөнүн тең катышуусун талап кылат. Бул ар бир эле адамдын жашоосундагы эң таасирдүү жана маанилүү учур. Ошол үчүн үйлөнүү-үлпөт тою өтөрү тууралуу маалыматты эми гана берип жатабыз. Күйөрмандарынан бул жаңылыкка түшүнүү менен кароону өтүнөбүз”.

“Соң Хе Кйо менен Соң Жун Ки экөө кыз-жигит болуп сүйлөшүп жүрүшөт” деген сөздөр өткөн жылы чыккан “Күндүн мураскерлери” деген сериалдан кийин башталган.

Маалымат үчүн:
Соң Хе Кйо – түштүк корей сериалдарынын сүйүүчүлөрүнө “Ва банктагы” ролу менен таанылган. Андан тышкары “Жүрөгүмдөгү күз”, “Хотельер”, “Куттуу үй”, “Ушул кышта шамал согот” сериалдарын белгилөөгө болот. Ал эми Соң Жуң Ки “Жакшы жигит”, “Рождество күнү кар жаайбы?” жана башка сериал-тасмаларга тартылган.