Айчүрөк Иманалиева: "Анжелика, сүрөтүң эмес, атыңды да уккум келбейт"

2 күндөн бери интернет айдыңында ырчы Анжелика Бекболиева менен ишкер, маркум Мухтар Өмүракунов экөөнүн кол кармашып түшкөн сүрөтү кызуу талкууга алынууда. Бул тууралуу Анжелика сүрөттү мындан 10 жыл мурун устаты Айчүрөк Иманалиева тартканын жана арадан бир топ убакыт өткөн соң элге жарыялап жатканын билдирген. Ал эми Айчүрөк Иманалиева өзү SUPER.KG порталына сүрөттү тартпаганын жана таратпаганын айтып, Анжеликага кайрылуу жасады.

“Буга чейин "Айчүрөк Иманалиева Анжелика ырдап жатканда музыканы өчүрүп салыптыр" деген маалыматты окуп, теңелбей эле коёюн деп унчуккан эмесмин. Эми интернетти аралап жүргөн сүрөтүңө да мени күнөөлөп жатыптырсың. Мен сенин сүрөтүңдү сактагыдай сен эмне, менин сүйгөнүм белең? Сенден көңүлүм калган күнү бардык сүрөттөрүңдү өчүргөм. Сүрөтүң эмес, атыңды да уккум келбейт! Күнөөнү менден эмес, сени мага кайраштырган жаныңдагы адамдардан изде. “Байке (ред. Мухтар Өмүракунов) кымбат фотосессия жасатып берейин деп жатат, чогуу барып келеличи” деп суранганыңда макул болуп, бир хан сарайга (особняк) барбадык беле. Телефон менен сүйлөшүп 10 мүнөткө эшикке чыгып келсем, энеден туума жылаңач болуп сүрөткө түшүп жатыптырсың. Ошол жерден кийимиңди үстүңө жаап, кыйкырып ыйлап, “менин өмүр бою таза иштеп, таза жашаган репутациямды бузба, бул эмне кылганыңар?” деп фотографтарды урушкам. “Бул сүрөт коомчулукка тарап кетсе, сотко берем” деп коркутуп, ал үйдөн сени колуңдан жетелеп алып чыгып кеткем, унуттуңбу? “Чыгарбагыла” дебегенимде ал сүрөттөр ошондо эле элди аралап кетет болчу. Бул биздин биринчи урушубуз эмес, сүрөттөрдү сен айткандай 10 жылдан бери сактап жүргөн болсом, буга чейин эле колдонбойт белем. Сага башканын тилин турмак, көзүн тийгизгенден кызганып, калкалап турганымды сен билбесең да, Кудай билет! Эми болсо бул сүрөттөргө мени күнөөлөп жатасың. Депутаттыкка, президенттикке ат салышып жаткан адамдар менин айтуум боюнча эле сүрөткө түшүп бермек беле, калп айтсаң да окшоштуруп айтчы!” - дейт ырчы ачууланып.

Ал эми интернет колдонуучулар сүрөттөргө карата ар түрдүү пикирлерин жазышууда. Алардын жарымы “өлгөн адамды да тынч койбойт экенсиңер” деп нааразы болушса, айрымдары “атактуу адам бир күндө 100 адам менен сүрөткө түшсө керек, кумурскадан пил жасабагылачы” деген ойлорун калтырышкан.