Күрөш боюнча Дүйнөнүн рейтингинде Айсулуу Тыныбекова 3-орунда турат

Дүйнөлүк күрөш бирикмеси (UWW) 2017-жылдын эркин күрөш жана кыз-келиндер күрөшү боюнча балбандардын жаңы рейтингин жарыялады. Аталган рейтингге Кыргыз өлкөсүнүн ­­3 балбаны кирген.

Айсулуу Тыныбекова 58 килограммга чейинки салмак категориясында дүйнөнүн мыкты балбандарынын арасында 3-орунда турат.

58 килограммга чейинки салмак категориясы. Алдынкы бешилтик:

1. Каори Итё (Япония) – "Рио" олимпиадасынын жеңүүчүсү;
2. Марва Амри (Тунис) – Африка чемпиондугунун жеңүүчүсү;
3. Айсулуу Тыныбекова (Кыргыз Республикасы) - Азия чемпиондугунун жеңүүчүсү;
4. Валерия Коблова-Жолобова (Орусия) – “Klippan Open” мелдешинин жеңүүчүсү;
5. Сакши Малик (Индия) – Азия чемпиондугунун күмүш медалынын ээси.

Ал эми эркектер арасындагы эркин күрөш боюнча рейтингде, 2016-жылы өткөн Дүйнө чемпиондугунда 70 килограммга чейинки салмак категориясында коло медалды ээлеген Эламан Догдурбек уулу дүйнөнүн мыкты балбандарынын арасында 11-орунда турат. Ошондой эле Азия чемпиондугунун 74 килограммга чейинки салмак категориясында күмүш медалынын ээси Муслим Евлаев 8-орунда турат.

Эске салсак, аталган бирикменин мурунку рейтинги боюнча Айсулуу Тыныбекова 5-орунда турган.