ЭЛДИК КАБАР: "Кызыл-Кыя шаарындагы тазаланбаган таштандынын азабын тартып жатабыз" дейт окурман

Баткен облусуна караштуу Кызыл-Кыя шаарындагы Султанов, Маяковский жана Ленин көчөлөрүнүн тургундары мэрияга нааразы. Бул тууралуу "Элдик кабарга" окурман билдирди.

"Шаардагы көп кабаттуу үйлөрдүн ортосунда таштанды төгүүчү жай бар. Аны мэриянын тийиштүү кызматы тазалап турушу керек болчу. Бирок канча ирет кайрылсак дагы көңүл бурбай, ташып кетпей жатышат. Таштанды улам барган сайын көбөйүүдө. Ал жакка адамдар мал-жан, ит-куштун өлүгүнөн тарта эч нерсени ылгабай баарын таштай беришет. Жайкы аптапта күнү-түнү терезелерди ачып коюуга туура келет. Антейин десең сырттан "урган" жагымсыз жыт буга жол бербейт. Анысы аз келгенсип таштандынын жанына адамдар бир нерселерди өрттөшөт. Уй, койлор ошол жерге жайылып, таштандыдан бир нерсе терип жешет. Аларга аралаш балдар да ошол аймакка жакын ойноодон башка аргасы жок. Оору-сыркоо жугабы деп коркобуз. Айтор, ушул көйгөйгө көңүл буруп чечип бере турган бирөө-жарым бар болду бекен?" - дейт окурман.