Өзгөн базарындагы өрт эмнеден улам келип чыкканынын болжолдуу себеби айтылды

Өзгөн шаарындагы базарда болгон өрт эмнеден улам келип чыкканынын болжолдуу себебин 9-августта SUPER.KG'ге ӨКМнын Ош облусундагы башкармалыгынын башчысы Сабиржан Курманбаев айтып берди. Анын билдиришинче, өрт электр энергиясын туура эмес пайдалануудан улам пайда болгон болушу ыктымал.

"Базардын администрациясы жана күзөтчүлөрүнүн берген маалыматына караганда, өрт электр энергиясын туура эмес пайдалануудан келип чыккан болушу ыктымал. Бирок бул да так эмес. Учурда атайын түзүлгөн комиссия чыгымдын көлөмүн жана өрттүн себебин тактап жатат. Так себеби комиссиянын корутундусунан белгилүү болот", - деди Курманбаев.

Эске салсак, базарда өрт чыкканы тууралуу маалымат райондук Өрт өчүрүү кызматына 29-июль күнү таңкы саат 04:40 чамасында келип түшкөн. Өрттү өчүрүүгө 7 өрт өчүрүүчү унаа катышып, эртең мененки саат 09:00 чамасында басаңдап, түшкө маал саат 11:30да толук өчүрүлгөн. Анын кесепетинен жалпы 2 миңдей чарчы метрди ээлеген соода орундуктары күйгөн. Алдын ала маалыматтар боюнча бул жерде 200дөн ашуун соода орундугу жайгашкан.