Астанада өтчү көк бөрү боюнча чемпиондукка Манас Ниязовдун аргымагы кетип, өзү калды

Кыргыз курама командасы Казакстандын Астана шаарында 20-28-август аралыгында өтө турган Дүйнө чемпиондугуна жөнөп кетти. Бул тууралуу Жаштар иштери, дене тарбия жана спорт агенттиги маалымдайт.

Маалыматка ылайык, көк бөрү боюнча Кыргыз курама командасынын тизмесине өзгөртүү киргизилген. Анда Кыргыз курамасынын оюнчулары Манас Ниязов жана Бактияр Жабагиев тизмеге киргизилген эмес.

Бул чечим көк бөрү күйөрмандарынын арасында кызуу талкуу жаратууда. Кыргыз курама командасынын мыкты оюнчуларынын бири болгон Манас Ниязовдун катышуусундагы оюнду көрүүгө ат майданга келген күйөрмандар ар дайым көп болгону маалым. Көк бөрү федерациясынан мыкты оюнчунун чемпиондукка барбай калышы боюнча комментарий алуу мүмкүн болгон жок.

Ал эми Манас Ниязов SUPER.KG порталына эмне себептен Дүйнө чемпиондугуна катышпай калганын айта алган жок. "Эмне себептен барбай калганымды федерациядан мага билдиришкен жок", - деди ал.

Кыргыз курама командасынын тизмесине Ниязов менен Жабагиевдин ордуна Акбар Иманбеков жана Нуржан Мелисбек уулу чакырылган.

Маалымдай кетсек, Астана шаарынын “Казанат” ат майданында өтө турган көк бөрү боюнча Дүйнө чемпиондугунда Кыргыз курама командасы “А” тайпасына туш келип Өзбекстан, Тажикстан, Монголия, Түркия жана АКШ курама командалары менен күч сынашат.

Кыргыз өлкөсүнүн көк бөрү курама командасы:

Жолдошбек Орозбаев ("Ынтымак" командасынан) минген аты Арбат;

Тынчтык Кабылбеков ("Ынтымак" командасынан) минген аты Торпеда;

Карыпбек Эшиев ("Ынтымак" командасынан) минген аты Эрке-тору;

Нуржан Мелисбек уулу ("Ынтымак" командасынан) минген аты Бойка;

Урмат Раушан уулу ("Ынтымак" командасынан) минген аты Ахилес;

Сейтбек Анарбек уулу ("Ынтымак" командасынан) минген аты Алтын-Каз;

Кубаныч Султан уулу ("Биримдик Аю" командасынан) минген аты Атаман;

Рустам Тыналиев ("Биримдик Аю" командасынан) минген аты Комбат;

Нурманбет Койчукеев ("Биримдик Аю" командасынан) минген аты Туман;

Акбар Иманбеков ("Достук командасынан") минген аты Рекорд;

Таштемир Замирбек уулу ("Достук командасынан") минген аты Алай;

Аскат Батырбек уулу ("Достук командасынан") минген аты Токмок.

Манас Ниязов "Супер-Инфого" берген маегинде "минип жүргөн аргымагымдын аты Бойка. 10 миң долларга сатып алгам. Аны өзүм багып, таптайм. Ал менин, мен анын сырын билем. Бул оюн учурунда абдан жардам берет" деген. Бойканы эми бул чемпиондукта Нуржан Мелисбек уулу минери белгилүү болду.