Сургут шаарындагы кол салууну Орусиянын тергөө комитети иликтөөдө

Сургут шаарындагы кол салууну Орусиянын Тергөө комитетинин Башкы тергөө башкармалыгы иликтөөдө. Бул тууралуу Тергөө комитетинин 20-августтагы тараткан билдирүүсүндө айтылат.

"Жарандарга кол салган шектүү 1998-жылы туулган Сургут шаарынын жашоочусу экени аныкталды. Азыркы тапта бир адам оор абалда, ал эми калгандарынын абалы орто. Кылмыш ишинин негизинде тиешелүү экспертизалар дайындалды. Учурда кол салуунун себептери такталууда", - деп айтылат Тергөө комитетинин маалыматында.

Айта кетсек, 19-август күнү жергиликтүү убакыт боюнча саат 11:20 чамасында бычак көтөргөн белгисиз адам көчөдө жүргөн бир канча адамга кол салган. Кылмышкер ошол эле жерден жок кылынган. Кол салуунун кесепетинен 7 адам жабыркап, ооруканага жеткирилген.

Ал эми айрым чет элдик маалымат агенттиктери кол салууну "Ислам мамлекети" террордук тобунун адамы кылганын жазып чыгышты.