АКШда "Харви" бороонунун кесепеттери эсептелүүдө

Американын Техас штатында катталган "Харви" бороонунун кесепеттери эсептелүүдө. Бул туурасында аталган өлкөнүн маалымат булактары жарыялады.

"25-августта башталган катуу бороондон Техастын Аранзас аймагында 3 адам каза болгондугун жергиликтүү өрт өчүрүү департаменти кабарлады. Учурда өзгөчө кырдаал боюнча топтор шамалдан кулаган бактарды, курулуш урандыларын тазалап жатышат. АКШнын бороонду алдын ала эскертүү боюнча улуттук борбору шамалдын басаңдаганын айтты. Бирок синоптиктер алдыда суу каптоо коркунучтары сакталып турганын айтышууда", - деп айтылат маалыматта.

Кошумчалай кетсек, "Харви" бороону боюнча АКШ президенти Дональд Трамп 2 күн мурун Техас штатында өзгөчө кырдаал учурун жарыялап, элди сак болууга чакырган. Американын аймагында мындан 12 жыл мурда да катуу бороон катталып, натыйжада Луизана штатынын Жаңы Орлеан шаарын суу каптаган болчу.