Баткен облусунда жыл башынан бери жашы жете элек балдардын катышуусунда 40ка жакын жол кырсыгы катталды

Баткен облусунун аймагында "Көңүл бургула, балдар!" аталышындагы рейд жүрүүдө. Баткен облустук ички иштер башкармалыгынын маалыматына караганда, 21-августта башталган рейд 20-сентябрга чейин уланат. Иш-чаранын негизги максаты облус аймагында жол кырсыктарын болтурбоо жана алдын алуу.

"Жыл башынан бери облус аймагында жашы жете элек балдардын катышуусунда 38 жол кырсыгы катталган. Анын кесепетинен 8 бала каза болуп, 42 өспүрүм денесинен ар кандай деңгээлдеги жаракаттарды алышкан. Бул көрсөткүч былтыркы жылга салыштырмалуу аз. Баткен ОИИБинин Патрулдук милиция бөлүмүнүн кызматкерлери ата-энелерге, айдоочуларга, өспүрүмдөргө жол белгилерине көңүл буруу, жол эрежелерин сактоо боюнча түшүндүрүү иштерин жүргүзүүдө. Жаңы окуу жылынан тарта ар бир мектептин алдына бирден Патрулдук милиция кызматкери бөлүнүп, иш алып барат", - деп айтылат Баткен ОИИБинин маалыматында.