Англияда 13 жашар кыз өлүмүнөн кийин 8 адамдын өмүрүн сактап калды

Англиялык Жемайма Лейзелл 13 жашында каза болгон. Бирок анын органдары 8 адамдын өмүрүн сактап калган. Бул сан Англия боюнча рекорд болуп эсептелет.

Чет элдик маалымат каражаттары кабарлагандай, 13 жаштагы кыз үйүнөн эсин жоготуп жыгылган. Бейтапканага жеткирилип 4 күндөн кийин баш мээнин аневризмасынан (мээдеги кантамырлардын кеңейип кетиши) улам көз жумган. Каза болордон мурда Жеймама донор болууну каалай турганын айткан. Мындан улам ата-энеси кызын донорлордун тизмесине киргизип коюшкан.

Жемайма каза болгондон кийин анын жүрөгүн, эки бөйрөгүн, өпкөсүн, ичке ичегисин, уйку безин муктаж болгон адамдарга салышкан. Ата-эне үчүн анын денесинин бир нече бөлүккө бөлүнүшү оор болсо да, кыздын тирүү кезиндеги керээзин аткарышкан.

"Биз үчүн бул чечимди кабыл алуу өтө оор болду. Бирок биз туура чечим кабыл алдык деп ойлойбуз. Жемайма тирүү болгондо бизди колдомок", - деп билдирген кыздын апасы.

Маалыматтарда белгилүү болгондой, кыздын атасы мунун баарына каршы болгон. Бирок сыналгыдан берилген жарнамалар аркылуу жардамга муктаж, көп жылдан бери донорлук органдарды күтүп бейтапканада жаткан оорукчан балдарды көргөндө ал өз макулдугун берген.